3-anyos paslit patay sa baliw na amok, suspek tigok sa kuyog
IRIGA CITY, Camarines Sur – Patay ang isang 3-anyos paslit makaraan pagtatagain nang nag-amok nilang kapitbahay sa Brgy. San Antonio, nitong Sabado ng hapon.
Ayon sa ulat ng pulisya, nagulat ang pamilya ng biktimang si John Andrew Albaño nang makitang nagwawala ang kapitbahay na si Hassel Namoro habang armado ng itak.
Kuwento ni Joseph, ama ng biktima, nakita niyang tumatakbo papunta sa kanilang bahay si Namoro kaya agad niyang ikinandado ang kanilang bakuran ngunit nakakita ng daan ang suspek papasok.
“Sinikyur ko ‘yung gate namin, itinali ko para ‘di siya makapasok. Humanap siya ng diversion diyan sa may palayan, diyan siya dumaan. ‘Di namin na ano na umikot sa kabila,” aniya.
Dagdag ni Angeline, ina ng biktima, ikinakandado niya ang harapang pinto ng kanilang bahay nang marinig niyang kumakalabog ang pinto nila sa likod.
“Ngayon inila-lock ko pa lang ang pintuan. May narinig akong kumalabog, pagtingin ko sa likod, ‘yun na pala ‘yun. Natakot ako kasi iba na ‘yung mukha. Iba ‘yung mukha,” aniya.
Kuwento ni Angeline, siya ang unang tatagain ng nagwawalang kapitbahay kaya umiwas siya at tumakbo. Agad sumunod sa kanya ang 13-anyos niyang anak ngunit naiwan ang bunso.
Tumakbo pabalik ang ina para sagipin ang anak sa kamay ng nag-amok na kapitbahay ngunit agad naikandado ng suspek ang pinto kaya hindi na siya nakapasok.
“Hahablutin ko sana, ‘di ko naabot ‘yung kamay. Nasarado na niya ‘yung pintuan, ‘yung baliw, naipit pa nga ako rito. Na-trap po sa loob ang anak ko,” umiiyak na kuwento ni Angeline.
Ayon kay SPO2 Eugene Aleflor ng Iriga City police, nagawa ng mga kapitbahay na pasukin si Namoro at saka nila pinagbabato hanggang mamatay. Ngunit sa puntong ito, tinaga na ng suspek ang paslit.
