Libreng sakay ng Senior Citizens sa LRT-2 at MRT-3, inihayag ni Rep. Datol

SIMULA sa araw na ito, 1-7 Oktubre 2018, ay libreng makasasakay ang mga Senior Citizen sa Metro Rail Transit-3 at Light Rail Transit-2.

Inihayag ito ni kahapon ni Senior Citizens Party-List Rep. Francisco Datol Jr., kaugnay ng pagdiriwang ng “Elderly Filipino Week” base sa mga tugon nina MRT-3 General Manager Rodolfo Garcia at LRT Authority Administrator Reynaldo Berroyo sa kanyang kahilingang bigyan ng tatlong araw na libreng sakay sa MRT-3 at LRT-2 ang mga nakatatanda.

“Tatlong araw lang ang hinihihiling ko kay Trans­portation Secre­tary Arthur Tugade pero pitong araw ang ibinigay ni­yang libreng sakay sa mga senior citizen,” ani Datol.

Ayon kay Datol, may libreng sakay ang mga nakatatanda sa LRT-2 mula 7:00 am to 9:00 am at 5:00 pm to 7:00 pm basta makapagpapakita ng identification cards mula 1-7 Oktubre 2018.

Idinagdag ni Datol na may libreng sakay rin ang lahat ng senior citizens sa MRT-3 mula 1-7 Oktubre basta makapagpakita ng senior citizen ID o anomang ID na makikita ang petsa ng kapanganakan.