Mackie, lalaking-lalaki na marunong magboses babae

Alex Datu August 23, 2018 Showbiz

MARAMI sa mga nanood sa Bakwit Boys, isa sa entry sa Pista ng Pelikulang Pilipino 2018 ang sobrang naaliw sa performance ni Mackie Empuerto ng TNT Boys. Magaling kasing umarte ang bagets maliban sa mahusay ding kumanta.

Katunayan, siya ang nagpa-iyak sa amin habang pinanonood namin ang isang eksena sa pelikula.

Ayon sa kanyang manager na si Jemuel Salterio, na-discover niya si Mackie sa isang singing contest sa Manila. Habang binabaybay nila ang isang distrito ng Sampaloc ay may narinig siyang kumakanta ng Listen. Pinahinto nito ang kotse para pakinggan ng buo ang kanta at nang natapos, may kinausap siyang taga-roon na dinala sa kanya ang bata.

Nang nakaharap na si Mackie, hindi siya kumbinsido na ito ang kumanta dahil isang babae ang tinig na narinig niya. Pero pinilit ng kausap na ang bata ang kumanta.

Sampung taon lang si Mackie at lumalaban na sa mga kontes at isa sa tiniyak nito kay Jemuel ay lalaki siya at marunong lang siyang mag-boses babae.