HATAW! D'yaryo ng Bayan hatawtabloid.com
IKINATUWA ni Senador Sonny Angara ang paglagda ni Pangulong Rodrigo Duterte sa National ID System upang maging ganap na batas sa bansa.
Naniniwala si Angara na ang National ID System ang tatapos sa bureaucratic red tape na nagpapahirap sa ating mga kababayan kung kaya’t pumapalpak ang serbisyo ng gobyerno sa taong bayan.
Paliwanag ng Senador, kapag may National ID na ang isang indibiduwal, hindi na siya mahihirapan pumasok sa anomang transaksiyon tulad ng pagkakaroon ng bank accounts, SSS number, Philhealth at iba pang transaksiyon.
Dagdag ni Angara, dahil sa National ID System ay sasabay na ang Filipinas sa mga maunlad na bansa na mayroon din kahalintulad na sistema na nagpapadali sa mga transaksiyon at sa mga serbisyo ng gobyerno.
Isa si Angara sa may akda ng Philippine Identification System Act.
(CYNTHIA MARTIN)
