HATAW! D'yaryo ng Bayan hatawtabloid.com
NATUPAD ang birthday wish ng 5-anyos batang lalaki na may leukemia na makasama si Pangulong Rodrigo Duterte sa kanyang kaarawan kamakalawa.
Nagdiwang ng kanyang kaarawan kamakalawa si John Paul kaya naglaan ng oras ang Pangulo kahit nasa kasagsagan ng cabinet meeting, para harapin ang bata na matapang na sinasagupa ang karamdaman na leukemia.
Sinabi ni Special Assistant to the President Christopher “Bong” Go, isa si John Paul sa mga benepisaryo ng P1 milyon napanalunan ng Malacañang basketball team na ibinigay ng koponan sa Philippine Children’s Medical Center (PCMC).
Unang nakilala ni Go si John Paul nang bumisita ang kalihim sa Philippine Children’s Hospital at dalawang beses nanood ng laro ng koponan ng Malacañang sa Pasig at Araneta Center sa Cubao, Quezon City.
Magugunitang malapit si Pangulong Duterte sa mga batang may karamdaman at patunay rito ang pagtatayo niya ng House of Hope sa Davao City na nagsisilbing pansamantalang tahanan ng mga batang may sakit na cancer.
(ROSE NOVENARIO)
