NAKOMPISKA ng mga pulis ang tinatayang P5 milyon halaga ng hinihinalang shabu mula sa isang condominium unit sa Sucat, Muntinlupa City, nitong Lunes ng madaling-araw.
Bago ang operasyon, isang buwan tiniktikan ng police Drug Enforcement Group (PDEG) ang condo unit na sinabing inuupahan ng Chinese national na kinilalang si Yang Ang Quan alyas Li Hong Peng, lider umano ng Peng drug syndicate, ayon kay Supt. Enrico Rigor, tagapagsalita ng police unit.
Napag-alaman, isinagawa ang pagsalakay sa bisa ng search warrant na inisyu ni Judge Juanita Guerrero ng Branch 204, sa inuupahang condo ng suspek at ng kinakasama niyang Filipina na si Aina Sale, sa Manimba Bldg., Rhapsody Residences, Brgy. Buli, East Service Road ng lungsod.
Aniya, nakasilid sa apat na plastic bag ang drogang nakuha mula sa lugar na pinananiwalaang warehouse ng shabu.
Gayonman, walang inabutang tao roon ang mga awtoridad.
Ikinasa ang operasyon bilang follow-up sa pagkaaresto noong nakaraang linggo sa isang Chinese sa Makati at tatlong Filipino sa Alabang, na pawang dawit umano sa bentahan ng droga.
(JAJA GARCIA)
