HATAW! D'yaryo ng Bayan hatawtabloid.com
BUMULAGTANG walang buhay ang dalawang hinihinalang snatcher na lulan ng motorsiklo makaraang masukol at makasagupa ng mga tauhan ng Manila Police District (MPD) sa gilid ng McArthur Bridge, sa Escolta St., Sta. Cruz, Maynila, kahapon ng madaling-araw.
Base sa ulat ng pulisya, naganap ang insidente pasado 12:00 am sa Binondo at natapos ang habulan sa gilid ng McArthur Bridge sa Escolta sa naturang lungsod.
Ayon kay MPD Station 11 Supt. Amante Daro, nagpapatrolya ang kanyang mga tauhan nang mamataan sa aktong hinablot ng mga suspek na riding-in-tandem ang bag ng isang biktima sa Escolta.
Idinagdag ni Daro, nagkaroon ng habulan hanggang makipagbarilan ang mga suspek nang masukol ng mga awtoridad.
Napilitan makipagpalitan ng putok ang mga tauhan ni Daro at pagkaraan ay tumimbuwang ang mga suspek sa kalsada.
Wala pang pagkakakilanlan ang mga suspek na isinugod sa Justice Jose Abad Santos General Hospital ngunit idineklarang dead on arrival bunsod ng mga tama ng bala sa katawan. (BRIAN GEM BILASANO)
