Serye ni Julia Montes na “Asintado” agad tinanggap ng TV viewers at umani ng libong tweets
May mass appeal talaga sa mga manonood si Julia Montes, at agad na kinapitan at namayagpag sa national TV ratings ang pag-uumpisa ng inaabangang serye ng ABS-CBN at Dreamscape Entertainment na “Asintado” matapos maghandog ng makapigil hiningang aksiyon noong January 15 (Lunes).
Nagkamit ang soap na pinagbibidahan ni Julia ng national TV rating na 17%, ayon sa datos ng Kantar Media. Naging usap-usapan din sa social media ang palabas matapos manguna sa listahan ng trending topics ang official hashtag ng programa na #AsintadoPanimula at umani ng libo-libong tweets.
Sa pag-uumpisa ng serye, nakilala ng TV viewers ang magkapatid na sina Juliana (Montes) at Katrina (Shaina Magdayao) na pinaghiwalay ng tadhana, matapos masunog ang kanilang tahanan na pumatay sa kanilang mga magulang.
Sa kanilang pagkakalayo ay magbabago ang kanilang kapalaran dahil kukupkupin sila ng dalawang magkaibigang pamilyang magbibigay sa kanila ng bagong buhay.
Ano nga ba ang naghihintay na kinabukasan para kina Juliana at Katrina? Makilala pa nga kaya nila ang isa’t isa sa pagkakataong magkita silang muli?
Marami pa kayong dapat abangan sa all-star cast na Asintado, napapanood tuwing hapon bago ang Hanggang Saan sa Kapamilya Gold.
