Obvious bias ng PET justice tinuligsa ni BBM
BINATIKOS ni dating Senador Ferdinand R. Marcos, Jr. kahapon ang aniya’y “obvious bias” ni Supreme Court Associate Justice Benjamin Caguioa, ang ponente ng kanyang election protest na nakabinbin sa Presidential Electoral Tribunal (PET), laban sa kanya at pabor kay dating Camarines Sur Rep. Leni Robredo.
Sa kanyang pagsasalita sa Kapihan sa Manila Bay sa Café Adriatico sa Malate, Maynila, sinabi ni Marcos, ang serye ng mga desisyon na ipinalabas ng PET sa kanyang election protest ay malinaw na nagpapahiwatig ng pagiging bias ni Caguioa laban sa kanya.
“It has now become fairly obvious that his resolutions are biased against me and biased in favour my oppositor,” pahayag niya sa mga journalist sa weekly forum.
Si Caguioa ay itinalaga ni dating Pangulong Benigno Aquino III. Sila ay magkaklase mula elementarya hanggang kolehiyo sa Ateneo De Manila University.
Bagama’t ang PET ay collegial body na kinabibilangan ng 15 mahistrado ng Supreme Court, sinabi ni Marcos si Caguioa, siyang nakatalaga sa kaso, ang nagdesisyon at nag-isyu ng minute resolutions hinggil sa kanyang protesta.
Inisa-isa ni Marcos ang ilan sa Orders na inisyu ni Caguioa na nagpapakita ng kanyang one-sidedness pabor kay Robredo. Aniya, noong Abril 2017, nagbigay ang PET sa kanya ng dalawang araw para bayaran ang kanyang inisyal na P36 million protest fee. Aniya, itinaon ito sa Holy Week na sarado ang mga banko. Sa kabila nito, nagawa niyang bayaran ang required fee sa ilalim ng PET Rules. Ang kanyang protesta ay maaaring madismis kapag hindi siya nakapagbayad sa oras.
Si Robredo sa kabilang dako, hindi nakapagbayad sa itinakdang dealine ng PET ngunit binigyan siya ni Caguioa ng extension.
“Yung aking kalaban pinagbayad siya sa counter-protest niya na P7 million pero hindi sya nagbayad. Pero binigyan siya ng extension. Pero hindi pa rin nakapagbayad at dinefer pa rin. Sa batas sinasabi kapag hindi pa nakapagbayad, idi-dismiss na yung kaso,” aniya.
Hanggang ngayon, makaraan ang siyam buwan, hindi pa rin nababayaran nang buo ni Robredo ang kanyang deposito.
