PINAULANAN ng bala ng hindi nakilalang armadong kalalakihan ang punong tanggapan ng Department of Labor and Employment (DoLE) kasabay ng Labor Day, sa Intramuros, Maynila, kahapon ng madaling araw.
Ayon ka MPD PS5 chief, Supt. Emery Abating, dakong 4:15 am nang pagbabarilin ng mga suspek ang DoLE main building sa Muralla Drive kanto ng Gen. Luna St. sa Intramuros.
Sa imbestigasyon ni PO3 Ferdinand Leyva, naka-duty ang security guard ng DoLE, na si Ruel Artezuela, 33, sa information/reception desk, nang biglang ratratin ng mga suspek ang main door ng tanggapan.
Upang hindi tamaan ng bala, agad dumapa ang guwardiya hanggang tumahimik ang paligid. Masusing iniimbestigahan ng mga awtoridad ang insidente. (BRIAN GEM BILASANO, may kasamang ulat nina Denny May Calago at Robeleyn Espinosa )
