BINAWIAN ng buhay ang isang 25-anyos hinihinalang adik sa droga makaraan makipagpalitan ng putok nang sitahin ng mga pulis sa anti-criminality campaign ng MPD PS-2 sa Tondo, Maynila kahapon.
Kinilala ang biktimang hindi na umabot nang buhay sa Gat Andres Bonifacio Hospital, na si Dexter Mendano, ng Gate 54, Area C, Parola Compound, Binondo.
Ayon sa imbestigayson ni PO3 Jorlan Taluban ng Manila Police District Homicide Section, dakong 1:45 pm nang maganap ang insidente sa Area D, Gate 17, Parola Compound.
Bago ang insidente, si Mendano at isang alyas Patrick ay nagtungo sa bahay ni Nicolas Diestro at doon gumamit ng ipinagbabawal na droga.
Ngunit paglabas ni Nicolas ay nakita niya ang mga pulis kaya agad inabisohan ang dalawa.
Paglabas ni Mendano, sinita siya ng mga pulis ngunit pumalag at nakipagpalitan ng putok sa mga awtoridad na nagresulta sa kanyang pagkamatay. ( LEONARD BASILIO, may kasamang ulat nina Maribeth Arines, Jam Breboneria at Ruth Liman )
