VIGAN CITY – Nagdulot ng takot sa mga residente ang pinaniniwalaang paghabol ng isang naka-custome ng clown sa isang babae sa Brgy. Ayusan Norte, Vigan City, Ilocos Sur kamakalawa.
Ayon kay Brgy. Kagawad Bernard Dasugo, chairman ng committee on peace and order sa naturang barangay, pauwi na ang biktima galing sa panonood ng volleyball tournament nang may nakita siyang nakaupo na duguang clown sa madilim na parte ng lugar.
Nang makalapit ang biktima ay hinabol siya ng suspek na pinaniniwalaang may hawak pang chainsaw.
Sumigaw ang biktima upang humingi ng tulong kaya’t tumakas ang suspek sakay ng SUV na may dalawa pang nakasuot ng bonet sa loob nito.
Agad naipaalam sa mga awtoridad ang insidente ngunit nang magresponde sila ay wala na ang mga suspek.
Dahil sa pangyayari, pinaalalahanan ni Dasugo ang mga magulang na bantayan ang mga anak at huwag basta-bastang papayagan na lumabas tuwing dis-oras ng gabi para sa kanilang seguridad.
