Trailer pa lang ng Third Party, sobrang nakaaaliw na

ISA lang ang gay movie na ipalalabas ang tumatak sa amin at dapat suportahan . Ito ‘yung The Third Party na showing sa October 12. Ito lang ang may temang kabaklaan na dapat panoorin at wala nang iba dahil hindi masasayang ang pera.

Trailer pa lang ay aliw ka na. Swak din ang chemistry nina Angel Locsin, Zanjoe Marudo, at Sam Milby.

Bilib din kami sa tatlong bida dahil pabor sila sa ongoing anti-drug campaign. Hindi sila gaya ng ibang artista riyan na may post pa na nagpo-promote ng marijuana, ‘no? Wala ring kiyeme ang tatlo na sumali sa random drug testing.Wala naman daw silang kinatatakutan.

Hirit pa nga ni Angel, hindi lang daw dapat artista ang dumaan sa drug test kundi pati politicians din. Kung ‘yun daw ang ikagaganda ng Pilipinas at ekonomiya, dapat lang daw na magtulungan.

Okey naman kay Zanjoe ang campaign sa drugs pero nakalulungkot lang ang mga balitang may mga namamatay na napagbibintangan lang o napagkakamalang pusher o user.

‘Yun lamang!

TALBOG – Roldan Castro