KRITIKAL ang kalagayan sa pagamutan ng isang 17-anyos canteen helper makaraan tamaan ng bala ng baril na ipinaputok ng isang lasing na lalaki na kaaway ng kanyang live-in partner kahapon ng madaling-araw sa Port Area, Maynila.
Nilalapatan ng lunas sa Gat Andres Bonifacio Medical Center ang biktimang si Robelyn Canda, residente ng Block 1, Dubai, Baseco Compound, Port Area, tinamaan ng bala sa likurang bahagi ng ulo.
Ayon kay Supt. Albert Barot, ng Manila Police District-Police Station 5, naganap ang insidente dakong 12:20 am sa Block 1, Gasangan, Baseco Compound.
Napag-alaman, naglalakad nang makasagutan ng live-in partner ng biktima na si John-john Flores, 18, vendor, ang lasing at hindi nakilalang suspek.
Bumunot ng patalim ang suspek at sinaksak si Flores ngunit mabilis siyang nakailag.
Bunsod nito, bumunot ng baril ang suspek at ipinaputok ngunit ang biktima ang tinamaan.
Pagkaraan ay mabilis na tumakas ang suspek.
( LEONARD BASILIO )
