INIHAYAG ni Justice Secretary Vitaliano Aguirre II kahapon, dalawa pang advanced signal jammers ang ikakabit sa susunod na linggo sa New Bilibid Prison’s (NBP) building, kinaroroonan ng high-profile inmates.
Sinabi ni Aguirre, ang dalawang signal jammers ay inilabas na mula sa Bureau of Customs at maaari nang ikabit sa Building 14 ng NBP.
“Ang cost nito ay P2 million each. This is only for Building 14,” aniya, idinagdg na ang bagong signal jammers ay maaaring makaharang ng 3G at LTE-capable mobile phones.
Aniya, walang ginastos na isa mang sentimo mula sa pera ng gobyerno sa pagbili ng dalawang signal jammers, idiniing ang equipment ay donasyon ng “Good Samaritan.”
Samantala, umapela si Aguirre sa karagdagan pang donasyong signal jammers. Aniya, nais niyang magkabit nang karagdagan pang advance signal jammers sa buong maximum security compound ng NBP.
Aminado ang kalihim, bagama’t nagsagawa ng serye ng pagsalakay ang mga miyembro ng Special Action Force sa NBP, nakapagpapasok pa rin ang mga preso ng mobile phones.
