APAT katao na sinasabing sangkot sa droga ang namatay sa magkahiwalay na pagsalakay ng hinihinalang mga miyembro ng vigilante group na Caloocan Death Squad sa naturang lungsod.
Sa imbestigasyon nina PO3 Rhyan Rodriguez at PO3 Romel Caburog, dakong 7:00 pm, nag-iinoman sa 243 Camia St. sina Mark Anthony Gonzales, dog trainer, at Danica Sobrapinya, kapwa 21-anyos, ng Park 2, Camia St., Brgy. 185, Malaria kasama ang kanilang mga kaibigan nang dumating ang tatlong armadong lalaking pawang naka-bonnet at facemasks saka walang sabi-sabing pinagbabaril ang mga biktima.
Nauna rito, dakong 6:30 pm, nakikipagkuwentuhan sa kanyang mga kaibigan malapit sa kanilang bahay ang construction worker na si Daniel Albano, 27, ng 164 Santo Cristo, Tala Brgy. 187 nang dumating ang dalawang hindi kilalang armadong lalaki at walang sabi-sabing pinagbabaril sa katawan ang biktima.
Sa Brgy. 20, natutulog sa loob ng kanyang bahay sa 4 Kabulusan 2 ang 17-anyos estudyante na si Albert Samson dakong 2:15 am nang pasukin ng hindi nakilalang mga suspek at siya ay pinagbabaril.
( ROMMEL SALES )
