BI-POD chief nagpapaalala ng tamang asal
Isang memorandum ang ipinalabas ni Bureau of Immigration Port Operation Division (POD) Chief Red Mariñas tungkol sa kanyang panawagan para sa lahat ng immigration officers na sakop ng BI-POD lalo na ‘yung mga naka-assign sa immigration counter — na ayusin ang pakikiharap at pagtrato sa mga pasahero.
Kasama na rito s’yempre ang pagbabawas ng masamang asal na kawalan ng modo at pagiging maangas ng isang immigration officer(IO)!
Mabuti naman!
Sa wakas ay nabigyan na rin ng babala ang dumaraming IOs na sagad ang kaangasan at kabastusan sa counter lalo na kung ang kaharap ay overseas Filipino workers (OFWs) na nakaaawa ang hitsura.
Tila hindi yata napaaalalahanan ang ilan sa kanila pagdating sa kagandahang asal lalo sa kapwa Filipino.
Nalimutan din yata nila na ang ipinasusuweldo sa kanila ay galing sa buwis na ibinayad ng taongbayan kasama na ang OFWs na kanilang sinusungitan!
Karamihan daw sa madalas na ireklamo ay ilang bagong immigration officers na wala pang limang taon sa kagawaran.
Kung maririnig sila kung paano magsalita at suminghal sa counters ‘e talagang manliliit ‘yung tao at puwede nang itakwil bilang kababayan!
Mas nararapat siguro na igarahe sila, agad-agad sa BI main office, sa pagpapakita ng masamang asal lalo sa mga kababayan at tanggalan din ng OT.
‘Yan ay para magtanda sila at hindi na pamarisan ng iba!
[divider]
Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
[divider]
