Bebot itinumba sa loob ng jeep

PATAY ang isang babae makaraan barilin ng kapwa pasahero sa jeepney  nitong  Huwebes  ng umaga sa lungsod ng Makati.

Kinilala ang biktimang si Lauren Kristel Rosales, 27, ng Sta. Ana, Maynila.

Ayon kay Sonny Priol ng Makati Public Safety Assistance (MAPSA), kapwa pasahero rin ng jeepney ang bumaril kay Rosales sa kanto ng N. Garcia St. at JP Rizal St.

Sinabi ni Priol, bumaba sa jeep ang ‘di nakikilalang lalaki bago dumating ang sasakyan sa kanto ng JP Rizal.

Nang huminto ang jeep dahil sa stop light, nagmadaling naglakad ang lalaki pabalik ng jeep at binaril ang biktimang nakaupo sa kanang bahagi ng pampasaherong sasakyan.

Habang tinamaan sa kanang hita ang isa pang pasaherong si Angelica Sarapanan, 13, nilalapatan ng lunas sa Ospital ng Makati.

Dagdag ni Priol, makaraan ang pamamaril, naglakad palayo ang suspek at iniwan sa isang kulay pink na tricycle ang suot na sombrero, jacket at baril na ginamit sa pagpaslang.

( JAJA GARCIA )