HINDI lulusot sa Kamara ang naisin ni President-elect Rodrigo “Digong” Duterte na ibalik ang parusang bitay sa ating bansa.
Ito ang paniwala ni House Speaker Feliciano Belmonte Jr., sa planong pagbuhay muli ng death penalty sa pagpasok ng Duterte administration.
Ayon kay Belmonte, hindi ito uubra sa Kamara dahil maraming naniniwalang mambabatas na hindi solusyon ang parusang kamatayan para sa pagresolba sa problema sa krimen at droga.
Pananaw ng mambabatas, maaaring maging dahilan lamang ito nang hindi pagkakaisa ng mga kongresista kung ipipilit ng susunod na gobyerno ang nasabing parusa.
Hindi diretsong sinabi ni Belmonte na tutol siya sa death penalty ngunit para sa kanya mas mainam na bigyan muna ng pansin ng Duterte administration ang pagpapalakas sa criminal justice system ng bansa.
