This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PATAY ang 5-anyos batang babae nang ma-trap sa kanilang nasusunog na bahay habang tatlo ang sugatan sa insidente sa Taguig City kahapon ng madaling-araw.
Kinilala ni SFO1 Aristeo Reloj ng Taguig City Fire Department, ang biktimang si Christine Noces, ng Purok 6, Kawayanan, Cayetano St., Brgy. Tuktukan ng nasabing lungsod.
Sugatan sa insidente sina Aldrin Carbon, Marites Fernandez, at Carmina Alfonso, pawang nasa hustong gulang, agad nilapatan ng lunas.
Sa inisyal na ulat ni SFO1 Reloj, arson investigator, nagsimula ang apoy sa bahay ng isang Benjie German, kapitbahay ng pamilya Noces, pasado 12 a.m. dahil sa napabayaang nakasinding kandila nang mawalan ng koryente.
Mabilis na kumalat ang apoy at natupok ang 200 bahay na pawang gawa sa light materials, sa naturang lugar. Umabot sa ika-limang alarma ang sunog bago naapula bandang 5:20 a.m.
Naiwang natutulog ang batang biktima sa loob ng kanilang bahay nang mangyari ang sunog.
Tinangka pa siyang gisingin at iligtas ng kanyang kapatid na hindi nabanggit ang pangalan.
Ngunit dahil malaki na ang apoy, walang magawa ang kapatid kundi tumalon na lamang sa bintana upang makaligtas sa sunog.
Aabot sa 300 pamilya ang nawalan ng tirahan habang mahigit sa P300,000 halaga ng mga ari-arian ang natupok ng apoy.
