Lim-Atienza sa UNA survey

ITO ang kinalabasan ng isang survey na isinagawa sa Maynila kailan lamang ng United Nationalist Alliance (UNA), na nanguna sina Vice Pre-sident Jojo Binay at Se-nator Bongbong Marcos sa presidential at vice presidential race, habang ang nagbabalik na alkalde na si Alfredo S. Lim, at ang number one 5th District Councilor Ali Atienza ang nanguna sa labanan ng mga kandidato para mayor at vice-mayor, ayon sa pagkakasunod.

Napag-alaman, isang independent survey firm ang kinomis-yon ng UNA upang magsagawa ng survey sa 4,800 respondents mula sa iba’t ibang bahagi ng Maynila.

Sa nasabing survey, nakatanggap si Binay ng 40.2 percent, na sinundan ni Grace Poe na nakakuha ng 34.0 percent; Rodrigo Duterte, 13.8 percent; Mar Roxas, 7.5 at undecided. 2.1 percent.

Sa vice presidential race, nakakuha si Marcos ng 53.4 percent, sinundan ni Sen. Chiz  Escudero sa 22.6 percent; Alan Peter Cayetano, 7.0 percent; Leni Robredo, 6.7 percent; Antonio Trillanes, 4.5 percent; Gringo Honasan, 3.8 percent at ang undecided ay nasa 2.0 percent.

Sa lokal na politika, si Lim ang nanguna sa hanay ng mga tumatakbo para alkalde nang makakuha siya ng 42.0 percent, kasunod si Amado Bagatsing, 35.6 percent, at Joseph  Estrada, nakakuha lamang ng 19.5 percent, habang ang undecided ay nasa 2.9 percent.

Ang kasalukuyang konsehal na si Ali Atienza ang nakakuha ng pinakamataas sa mga tumatakbong bise-alkalde ng Maynila, nang makatanggap siya ng 58.8 percent, sinundan ni Congressman Atong Asilo na nakakuha ng 17 percent; Honey Lacuna Pangan, 12.4 percent, at Trisha Bonoan, 9.0 percent. Ang undecided ay nasa 2.2 percent.

Si Lim ay tumatakbong alkalde sa ilalim ng Liberal Party (LP) ng administrasyon at hindi sa ilalim ng UNA o ano mang partido na kaalyansa ng oposisyon. Ang kanyang palagiang pangunguna sa mga survey ay nag-uugat sa kanyang planong ibalik ang mga libreng serbisyo sa ospital na kanyang pinasimulan at nawala nang siya ay umalis ng City Hall, gayondin ang libreng serbisyo sa 59 barangay health centers at 12 lying-in clinics o paanakan, gayondin ang pagtitiyak na kanyang ibabalik sa lumang presyo ang mga buwis at amilyar bago pa ito itaas ng kasalukuyang administrasyon nang may 200 porsyento.

Si Atienza naman ay kilala sa paglaban sa mga hakbang at ordinansa na maaaring magdulot ng pahirap sa maliliit gaya ng pagsasapribado sa mga pamilihang-bayan at pagtataas ng amilyar.