Broadcaster hinoldap ng call center agent (Sa loob ng simbahan)

HINAMPAS sa ulo ang isang broadcaster ng silyang kahoy ng isang call center agent at inagaw ang kanyang bag habang taimtim na nagdarasal sa loob ng prayer room ng isang simbahan sa Muntinlupa City kamakalawa ng hapon.

Nilalapatan ng lunas sa Muntinlupa Medical Center ang biktimang si Yvone Rebeca, 50, broadcaster ng hindi pinangalanang network, at residente ng Muntinlupa City.

Kinilala ni Muntinlupa police chief, Sr. Supt. Nicolas Salvador ang suspek na si Garcia Agnes, 32, ng 10 Waling-Waling St., San Antonio Valley 17, Brgy. Talon 4, Las Piñas City, nakapiit na sa detention cell ng pulisya.

Base sa ulat ng pulisya, dakong 5:30 p.m. kamakalawa nangyari ang insidente sa loob ng prayer room ng Saint Jerome Parish Church sa Brgy. Ayala Alabang Village.

Sa panig ng suspek, sinabi niyang nagawa niyang holdapin ang biktima dahil gipit siya sa pera dahil baon siya sa utang.