This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
IPINAGHARAP sa piskalya ng kasong libelo at paglabag sa Fair Election Act ang live-in partners na nahuling namimigay ng leaflets na nakasisira sa magandang track records sa serbisyo publiko ni Muntinlupa City incumbent Mayor Jaime Fresnedi.
Kinilala ng pulisya ang naarestong suspek na si Gemma Aquino, 40, residente ng Purok 6, San Guillermo St., Bayanan, Muntinlupa, habang nakatakas ang kinakasama niyang si Raul Aquino, 36, residente rin sa nabanggit na lugar.
Samantala, dahil menor de edad ang tatlong naarestong kabataan na kasama ng mga suspek, inilipat sila sa kustodiya ng Bahay Pag-Asa, sa Tunasan, Muntinlupa, sa ilalim ng pamamahala ng Social Services Department.
Nabatid na dakong 10:20 a.m. nitong Sabado nang matiyempohan sila nina Jose Espineda Jr., Serge Preye at Joel Del Rosario, mga miyembro ng Public Order and Safety Office (POSO) na namimigay ng flyers sa Doña Anastacia Ave., Victoria Homes, Tunasan.
Nakompiska sa mga suspek ang dalawang bag na naglalaman ng 180 piraso ng leaflets na may mga nakasulat na malicious information laban sa alkalde at kanyang administrasyon.
Marami ang naniniwala na “disgrutled” na talunang politiko ang nasa likod ng black propaganda sa pagpapakalat ng leaflets ngunit walang basehan.
