Dapat kurutin sa singit ng mga guro si VP Binay
UMAALMA ang sektor ng edukasyon, lalo ang Pinoy teachers, sa pahayag ni Vice President Jojo Binay kamakailan na walang kaugnayan umano ang pagiging isang teacher pagdating sa pamumuno sa gobyerno.
Nagsimula ang gusot ni Binay nang kanyang direktang patutsadahan ang dating preschool teacher bago naging senador na si Team Galing at Puso standard-bearer Grace Poe sa pagsasabi sa press at media na ang karanasan at kasanayan ng isang guro ay para lamang sa pagtuturo.
Agad namang binuweltahan ni Poe si Binay nang kanyang sabihin na hindi maaabot ng bise-presidente ang kasalukuyang posisyon at tagumpay sa buhay kung hindi dahil sa maraming gurong nakasalamuha niya.
Naniniwala siya na ang isang gurong tulad niya ay dapat bigyan din ng pagkakataon na tumakbo para sa pinakamataas na posisyon sa bansa.
Para sa senadora, ang Pinoy teachers ay nauunawaan nang lubusan ang kanilang kapwa habang tumatayo bilang mga pangalawang magulang sa eskuwela at hindi lamang basta nagtuturo ng mga leksiyon kundi pati ng kabutihang asal.
Labis na ikinalulungkot ni Poe ang naging pananaw ni Binay dahil aniya: “Ang mga guro ang nagbabantay ng ating mga boto pero bakit sasabihin niya hindi sila maaaring tumakbo sa pagkapangulo? Ipinagkakatiwala natin sa mga guro ang ating mga anak ngunit bakit sasabihin niya na hindi nila kayang pamunuan ang bansa?
Hindi na uso ngayon ang mababagsik na teacher pero dapat sigurong makatikim ng kurot sa singit ang bise-presidente.
[divider]
