This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
NAGWAKAS na ang pagtatago sa batas ng isang lalaking most wanted person na suspek sa pagpatay sa isang pulis, makaraang masakote ng mga awtoridad nang muling bumalik sa kanilang tirahan sa Caloocan City kahapon ng umaga.
Kinilala ni Caloocan City Police chief, Sr. Supt. Bartolome Bustamante ang suspek na si Danilo Natividad, alyas Ting-ting, 40-anyos, ng Luke St., Brgy. 177, Camarin ng nasabing lungsod, nahaharap sa kasong murder, nakapiit sa detention cell ng Caloocan-PNP.
Ayon kay Chief Insp. Alfredo De Guzman Lim, hepe ng Caloocan Police Intelligence Unit, nakatanggap sila ng impormasyon na bumalik ang suspek sa kanilang lugar upang bisitahin ang kanyang pamilya.
Agad bumuo ng team ang kanyang mga tauhan sa pangunguna ni SPO3 Aurelio Aranida at isinagawa ng follow-up operation dakong 7 a.m. sa Cielito Homes Subd., Brgy. 177, Camarin ng nasabing lungsod, na nagresulta sa pagkakaaresto kay Natividad.
Sa record ng pulisya, suspek si Natividad sa pagpatay kay SPO2 Ricardo Agacer, dating miyembro ng SWAT ng Caloocan North Police noong 2006 makaraan ang naganap na rambol sa loob ng isang beerhouse sa Zapote Road, Camarin ng nasabing lungsod.
