AGAD binawian ng buhay ang isang 19-anyos estudyante nang mahulog habang nagse-selfie mula sa roof deck ng 20-palapag na condominium sa Ermita, Maynila kamakalawa.
Kinilala ang biktimang si Cristina Marie Pagalilauan, 3rd year Mass Communication student sa Adamson University, residente sa B2, L21 Eternity St., Compil 3, San Vicente, San Pedro, Laguna.
Ayon kay Manila Police District Homicide Section PO3 Al Layugan, umakyat sa roof deck ng Dahlia Tower ng Suntrust Parkview Condominium sa Natividad Lopez St., ang biktima kasama ang kaklaseng si Jonea Mildred Ani upang kumuha ng mga larawan.
Sumampa ang biktima sa parapet wall dahil overlooking ang background.
Binalaan ni Ani si Pagalilauan ngunit nagpatuloy pa rin ang biktima hanggang mahulog.
Hindi agad nakita ni Ani ang pagkahulog ng biktima dahil abala siya sa kanyang cellphone.
Napag-alaman, sa nasabing condo nakatira ang boyfriend ng biktima na kasalukuyang nasa probinsiya.
ni LEONARD BASILIO
