Kung Kitchen One ng V. Roque Corp. ang kukunin ninyo mag-isip ng 10 beses!

BABALA lang po sa ating mga suki, sakali mang kukunin ninyo ang serbisyo ng KITCHEN ONE ng V. Roque Corp., para sa inyong ipinagagawang bahay o restaurant, aba mag-isip muna kayo ng 10 beses tapos 70 beses pa ulit at pagkatapos pitumpu’t pitong beses pa ulit.

‘Yan ay para huwag ninyong maranasan ang kunsumisyon at sakit ng ulong dinaranas ngayon ng isang kaibigan natin.

Inamin niyang maling-mali siya nang kunin niya ang serbisyo ng Kithen One ng V. Roque.

Huwag kayong magpaparahuyo sa sinasabi ng Kitchen One ng V. Roque Corporation, na makers daw sila ng customize kitchen at sila umano ay “industry leader and country’s premier manufacturer.”

Sa realidad po kasi ay walang katotohanan ito.

Nakunsumi lang nang husto ang kaibigan natin dahil matapos nga niyang magbayad nang buo… repeat: FULL PAYMENT para sa installation ng kanyang kitchen ‘e biglang ‘nganga’ na sila sa kahihintay kung kailan mai-install ang nasabing kitchen.

Nang ma-install naman, hindi eksakto ang mga sukat, kaya puro awang.

Aba ‘e nagsukat pa ang V. Roque hindi naman sakto.           

Mukhang sa singilan lang mabilis pero makupad at palpak naman sa serbisyo.

Kapag nag-follow-up sila napakasusungit pa ng mga tao sa customer service at ang pangakong magpapadala ng installer sa schedule na araw ay hindi naman nangyayari.

Again, ang nakaiinis dito ‘e ‘yung rason ng V. Roque, nagkaroon daw sila ng problema sa mga installers nila dahil sa isyu ng allowances.

Huwag ninyong ipasa sa customer ang labor problem ninyo!

Ano ang paki ng nag-full payment na customer sa labor disputes ninyo?!

Bayad ang customer at kung may problema kayo sa installers ninyo, problema ng kompanya n‘yo ‘yan at hindi ng customer!

Be professional naman Kitchen One & V. Roque. Ang yabang ng profile ninyo… “since 1977… an industry leader and the country’s premier manufacturer of modular kitchens, cabinets, closets, and doors.”

Aba ‘e kung 38 years na kayo sa industriya dapat mayroon na kayong reserbang installers. Ayaw ko namang sabihin na may kostumbre kayong manunuba kung bakit nilalayasan kayo ng installers ninyo.

Kung diyan kayo umasenso at diyan kayo nagkaroon ng pangalan sa industriya, dapat minamahal rin ninyo ang mga installer at customers ninyo.

‘E parang one-way ang pakikitungo ninyo sa customers ninyo.

Kung bayad na ‘yan, gawin ninyo ang lahat ng paraan para tuparin ang serbisyong dapat na ipagkaloob ninyo sa kanila.

Ayusin ninyo ang serbisyo ninyo dahil BAYAD na KAYO!

[divider]

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit http://www.hatawtabloid.co