This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
ARESTADO ng mga ahente ng National Bureau of Investigation (NBI) ang isang “sextortionist” na nam-blackmail sa kanyang dating nobya na ipo-post ang kanilang sex video kundi makikipagtalik sa kanya sa isang motel sa Pasay City kamakalawa.
Dinakip ng mga ahente ng NBI Cybercrime operatives ang suspek na si Mark Glen Sanchez, 36-anyos.
Ayon sa biktimang si Mila, ang pamba-blackmail ay ginawa ng dating kasintahan sa kabila na siya ay mayroon nang anak at asawa.
Nabatid na nagpapadala rin ang suspek ng putol-putol na kopya ng kanilang sex video sa mga kamag-anak, kaibigan at mga katrabaho dahilan para humingi ng tulong sa NBI ang biktima.
Nagbanta aniya ang suspek na ipadadala ang kabuuang sex video nila kapag hindi siya pumayag na muling makipagtalik sa suspek.
Sanhi nito, inilatag ang entrapment operations at naaresto ang suspek.
Sinabi ni NBI Cybercrime Division Executive Officer Atty. Vic Lorenzo, maaaring masampahan ng kasong rape ang suspek.
“Sa statement kasi ng biktima, may sinasabing pinilit siya at puwedeng mag-fall ‘yun sa rape, Violence Against Women Act at the same time ‘yung Anti-Voyeurism Act. ‘Yun ang mga possible charges na isasampa namin sa suspek,” dagdag ni Lorenzo.
Nakapiit na sa NBI ang suspek at inihahanda ang pagsasampa ng kaso laban sa kanya.
