This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
BUBUO ng special investigation team ang Department of Justice (DoJ) para siyasatin ang pagpatay at pangha-harass sa mga katutubong Lumad sa Mindanao.
Ayon kay Justice Secretary Leila De Lima, nagpadala na ng direktiba ang tanggapan ng Executive Secretary sa DoJ para maimbestigahan agad ang isyung ito.
Paliwanag ni De Lima, masalimuot ang naturang isyu na may kaugnayan sa kalagayang lokal.
“May mga root causes po ‘yan. It’s actually a complex matter. It’s beyond the acts of killings, harassment and coercion na nagko-cause ng displacement ng Lumad. They are caught in between mga local situation diyan,” ani De Lima.
Dagdag ni De Lima, may mga nauna nang kasong naisampa ang local prosecutors office na sangkot ang “paramilitary forces” na sinasabing pumatay sa ilang Lumad.
“Inaalam namin kung sino ho ba talaga ang mga nasa likod ng mga para-military forces na ‘yan,” aniya.
Ang grupong bubuuhin ng DoJ ay pinagsamang puwersa ng National Prosecution Service (NPS) at National Bureau of Investigation (NBI).
“I will again create a joint NBI-NPS special investigation team, Although I was told by Director Mendez na ‘yung mga local NBI nila, nagsimula na ring mag-imbestiga,” ani De Lima.
