This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PINALAKAS ng Manila International Airport Authority (MIAA) ang puwersa ng seguridad sa labas ng mga terminal ng Ninoy Aquino International Airport (NAIA) upang biguin ang masasamang elemento na gumagala sa paligid ng paliparan.
Inihalimbawa rito ang naganap na pang-aagaw ng cellphone sa isang intern ng China Southern Airlines nitong Agosto 7, dakong 2:37 a.m. habang ang biktima ay papasok sa Terminal 1.
Ayon kay David de Castro, dinoble ang monitoring sa Terminal 1 at sa lugar kung saan naging biktima ng agaw-cellphone si Yshkael Cherub Co.
Batay sa report, kakukuha pa lamang ni Co ng kanyang on-duty ID sa pass control office at habang paakyat siya sa hagdan nang biglang may humarang na lalaki saka inagaw ang kanyang iPhone 5c mobile phone.
Tumakbo ang suspek patungong International Cargo Terminal road saka naglaho.
Sinubukang habulin ng isang security guard ang suspek ngunit hindi na nakita.
Sa text message ni De Castro, kasalukuyang iniimbestigahan ng pamunuan ang insidente.
Pinahigpit ang pagbabantay ng airport police ang paligid ng NAIA terminals upang hindi na maulit ang cellphone snatching sa lugar.
