HATAW! D'yaryo ng Bayan hatawtabloid.com
HATAWAN – Ed de Leon.
EWAN nga ba kung bakit, pero mukhang mas napag-usapan pa ang sinasabing pagbabalikan nina Dr. Manny at Pie Calayan kaysa kanilang mga bagong produkto at sa katotohanang dalawang dekada na pala ang kanilang beauty at surgicenter business. Nagkaroon kasi ng tsismis tungkol sa mag-asawang dermatologist na umano nagkahiwalay sila, at ang pinagbibintangang involved ay isang seksing female star.
Pero hindi naman pala totoo iyon. Binabantayan lamang ni doktora ang kanilang mga anak na nag-aral sa US, at sinubukan din nila na magtayo ng clinic doon.
Iyong clinic sa US, kahit na marami rin daw pasyente, napilitan silang isara nang kailangan nang bumalik sa Pilipinas si Dra.Pie, kasi kahit na may makukuha naman silang associate doctors na maaari nilang ilagay doon, ayaw nila dahil gusto nila sila mismo ang haharap sa mga pasyente.
“Kaya nga kahit dito sa Pilipinas hindi kami nagparami ng clinic eh, kasi gusto namin kami mismo ang titingin sa pasyente. Kung ibang doctor din ang haharap sa kanila, para ano pang sasabihing pasyente sila ni Calayan,” sabi ni Dr. Manny.
Anyway, dalawang dekada na sila sa negosyo, at involved pa rin sa showbiz dahil sa napakaraming mga artistang nagpupunta sa kanila, kahit na hindi naman nila mga endorser.
