NAGDESISYON na ang Barangay Ginebra San Miguel na sibakin na ang Asyanong import na si Sanchir Tungala ng Mongolia.
Dumating na sa bansa kahapon ang magiging kapalit niyang si Ji Wan Kim na isang Koreano.
Isang source ang nagsabing inalis ni coach Frankie Lim si Sanchir dahil hindi siya marunong magsalita ng Ingles at kahit may interpreter ang huli ay hindi talaga siya nakasundo ni Lim.
Nag-average lang si Sanchir ng 4.5 puntos sa apat na laro niya sa Ginebra na may dalawang panalo at apat na talo sa PBA Governors’ Cup.
Kagagaling lang si Kim sa kanyang paglalaro sa isang liga sa Korea.
Samantala, nagpapagaling ang isa pang import ng Ginebra na si Orlando Johnson sa isang ospital sa Taguig pagkatapos na mahilo siya sa laro ng Kings kontra San Miguel Beer noong Linggo.
Nahulog sa sahig si Johnson at tinamaan ang kanyang ulo nang bumagsak siya pagkatapos na sinupalpal siya ni AZ Reid sa unang quarter ng laro kung saan nanalo ang Beermen, 100-85.
Sinabi ng isang doktor na okey na ang kondisyon ni Johnson at lalaro na siya sa susunod na asignatura ng Ginebra kontra Globalport bukas.
(James Ty III)
