HATAW! D'yaryo ng Bayan hatawtabloid.com
KAKAIBA ang konsepto ng pelikulang pagsasamahan nina K Brosas at Pooh, ang Espesyal Kopol na mapapanood na sa June 3 handog ng Bagon’s Film at idinirehe ni Buboy Tan.
Ang Espesyal Kopol ay ukol sa pagpapanggap nina K at Pooh bilang mag-asawa para may makuhang importanteng bagay na pareho nilang gusto.
Ayon kina K at Pooh, dapat abangan ang last part ng pelikula na mayroon silang love scene dahil kakaiba raw iyon.
Napag-alaman naming dapat pala’y si Pokwang ang gaganap na asawa ni Pooh pero hindi kinaya ng schedule nito kaya napunta sa kaibigang si K ang role.
Ayon kay direk Buboy, iniba ang hitsura ni K Brosas sa pelikula dahil nilagyan ito ng false teeth kaya pati ang pagsasalita’y nabago.
Dadalhin sa Canada at iba pang parte sa Amerika ang Espesyal Kopol. Ayon kasi kay Mama Dhel, dalawa sa producer na kasama niya ay taga-Canada. Kaya may pagkakataong mapanood ng mga kababayan nating nasa Canada at America ang pelikulang tiyak na magpapatawa at magpapasaya sa kanila.
Kasama rin sa Espesyal Kopol sina Manuel Chua, Gene Padilla, Isadora, Pia Moran, Emma Villanueva, J Pranco, Benz Sangalang, Witney Tyson, John Romano, Danny Labra, Ruby Ruiz, Eddy Tuazon, Jackstone 2, at Jack n Poy.
ni Maricris Valdez Nicasio
