HATAW! D'yaryo ng Bayan hatawtabloid.com
ISANG malaking upset ang itinala ni Samantha Louis Ramos sa Luzon Qualifiers ng Sun Cellular National Juniors Badminton Tournament na ginanap sa Baliwag Gymnasium sa Bulacan kahapon.
Ginulat ni Ramos ang top seed at beteranong national player na si Alyssa Alvarez Geverjuan, 21-13, 21-18, upang makapasok sa semifinals.
Makakaharap niya si Qianxi Orillaneda na nanalo naman kontra kay Mary Ann Amposta, 21-8, 21-18, sa girls’ under-19 division.
Sa ibang mga resulta, pinatumba ni Ann Jeline Lopez Masongsong si Irish Queen Molina, 21-19, 21-14, habang pinadapa ni Mariya Anghela Canlas si Maria Estrella Duran, 21-9, 21-6, upang makumpleto ang mga lalaban sa semis sa torneong handong ng Sun Cellular, Smart Communications, MVP Sports Foundation, Smash Pilipinas, Victor Badminton at Fortright Events & Sports Management.
(James Ty III)
