Dimakiling binulaga si GM Ghosh

INIAHON ni IM Oliver Dimakiling ang kampanya ng mga Pinoy woodpushers matapos manalo sa round five ng 15th Bangkok Chess Club Open sa Pattaya, Thailand.

Binulaga ni No. 24 seed Dimakiling (elo 2417) si ranked No. 1 GM Diptayan Ghosh (elo 2512) ng India sa 35 moves ng Reti habang yumuko si GM Oliver Barbosa kay super grandmaster at top seed Wang Hao (elo 2713) ng China.

Kasali sa liderato si Barbosa (elo 2489) bago siya natalo kay Wang sa 37 sulungan ng Slav.

Dahil sa panalo ni Dimakiling, siya naman ang nakisalo sa unahan tangan ang 4.5 points papasok ng sixth round.

Kasalo ni Dimakiling sa first to fifth places sina Wang, No. 2 seed GM Francisco Pons Vallejo (elo 2696) ng Spain , GMs Jan Gustafsson (elo 2639) ng Germany at Jozsef Horvath (elo 2522) ng Hungary .

Makakalaban ni Dimakiling sa susunod na laro si super GM Bartosz Socko (elo 2628) ng Poland habang magkatapat sa top board sina Wang at Vallejo .

Napako sa apat na puntos si Barbosa upang makisiksik sa sixth to 24th place kasama ang tatlong Pinoy woodpushers na sina Asia’s first grandmaster Eugene Torre (elo 2460), GM Darwin Laylo (elo 2496) at 17-year old IM Paulo Bersamina.

Nanaig si Bersamina (elo 2390) kay Y V K Chakravarthy ng India habang nakipaghatian ng puntos sina Torre at Laylo kina Parab Ritviz at IM Dhopade Swapnil (elo 2446) na mga taga India ayon sa pagkakasunod.

Samantala, isang norm na lang ang kailangan ni Dimakiling upang maging ganap na grandmaster at maaari niyang makuha dito sa tournament kung magtutuloy ang magandang laro niya hanggang last round.

Ni ARABELA PRINCESS DAWA