BUCOR Director Franklin Bucayo, bilib na ko sa tibay at kapal mo!

TALAGANG matindi rin ang fighting spirit ni Bureau of Corrections (BuCor) Director Franklin Bucayo.

Nakabibilib ang tapang ng hiya ng mamang ito.

Kanino kaya nanghihiram ng kapal ng mukha si Bucayo at sa kabila ng sunod-sunod na bulilyaso sa National Bilibid Prison (NBP) ay hindi pa rin niya naiisipang mag-resign at lumayas na riyan.

Aba, si Justice Secretary Leila De Lima ang nakikita nating nagtatrabaho diyan sa Bilibid at hindi na siya.

Para na lang siyang flower vase diyan at si SOJ De Lima na lang ang kumukumpas sa operation ng Bilibid.

Ilang beses nang ni-raid ang NBP at katakot-takot na armas ang nakuha pero hayan mayroon pa rin nakapagpasabog ng granada.

Dahil sa nabulabog na lihim ng Guadalupe sa Bilibid, pupusta tayo na mayroon pang mga susunod na pangyayari pagkatapos niyang pagpapasabog na ‘yan.

At ‘yun ang dapat mong abangan, ret. Gen. Bucayo!

Kung gusto mo pang manatili sa iyong posisyon, dapat ay mayroon kang kakaibang intelligence skills para ma-pre-empt ang mga susunod pang mangyayari na tiyak na maglalagay sa kanila sa kahihiyan ni Secretary De Lima.

Pero kung wala kang kakaibang intelligence skills o wala ka na talagang ibubuga, palagay natin ‘e dapat nang mag-resign si Director Bucayo.

Bakit kaya hindi subukan ni SOJ De Lima, na isang civilian naman ang mamuno sa Bucor/NBP, e marami na tayong nakitang naitalaga diyan na mga ex-police/military pero dehins naman nagkaige ang trabaho nila ‘di ba?

Wala po itong masamang tinapay, ang sa atin lang ‘e ‘yung kung ano ang nararapat at ikabubuti sa Bilibid.

‘Ano sa pakiramdam mo Director Bucayu?!