SINALAKAY ng mga operatiba ng Special Operation Unit (SOU) ng Pasay City Police ang dalawang pasugalan at isang KTV bar na ginagawang prostitution, sa magkakahiwalay na lugar kamakalawa sa nasabing siyudad.
Sa pangunguna ni SOU Officer in Charge, Chief Inspector Lerpon Platon, una nilang sinalakay ang Richman KTV Bar & Restaurant sa 229 FB Harrison St., Brgy. 13, Zone 4, Pasay City.
Ayon kay Pasay City Police chief, Sr. Supt. Melchor Reyes, dakong 5 a.m. nang salakayin ng kanyang mga tauhan ang KTV bar dahil sa natanggap nilang impormasyon na ginagawang front ng prostitusyon.
Arestado ang limang empleyado ng KTV bar kabilang ang apat na babae at isang lalaki na sina Ton Alindong, alias Ton-Ton, 39; Joy Cruz, alias Joy, 29; Andrea Flores, 22; Catherine Santos, alias Cat, 24; at Venus Dela Cruz, 28, pawang stay-in sa bar.
Sinabi ng hepe ng Pasay Police, dinakip ang mga empleyado dahil sa paglabag sa City Ordinance na pagtatrabaho nang walang working permit.
Samantala, dalawang pasugalan sa magkahiwalay na lugar ang sinalakay rin ng mga tauhan ng SOU. Sinalakay ang may operasyon ng colored games sa Villanueva St., at Park Avenue Extension ng nabanggit na lugar.
Sinabi ni SPO2 Delfin Macario, nang salakayin nila ang mga naturang lugar inabutan nila ang mga kabataan na nagsusugal.
(JAJA GARCIA)
