HATAW! D'yaryo ng Bayan hatawtabloid.com
KORONADAL CITY – Binawian ng buhay ang isang sanggol na lalaki habang sugatan ang kanyang ina nang aksidenteng mabaril ng ama sa Sitio Mayada, Brgy. Libas, Tantangan, South Cotabato kamakalawa.
Kinilala ng Tantangan PNP ang biktimang namatay na si Carl Steven Cabel, isang taon gulang, tinamaan ng bala sa noo.
Habang sugatan din ang kanyang ina na si Jocelyn Anton, 27, tinamaan ng bala sa noo at dibdib.
Agad naaresto ang suspek na live-in partner ni Jocelyn na si Carl Stanley Tabuloy Cabel, 24, tribal chieftain sa nasabing barangay.
Nabatid sa imbestigasyon, nagkaroon ng alitan tungkol sa lupa ang suspek at ang mga kapatid ni Jocelyn na sina Oliver, Jonathan at Enin Anton.
Bunsod nito, naglabas ng homemade firearm ang suspek at itinutok sa magkakapatid.
Gayunman, sinikap itong agawin ng isa sa magkakapatid na nagresulta sa hindi inaasahang pagputok at tinamaan ang mga biktima.
(BETH JULIAN)
