INOOBSERBAHAN ang 42-anyos driver makaraan pagtulungan bugbugin at saksakin ng tatlong lalaki kamakalawa ng gabi sa Pasay City.
Nakaratay sa San Juan De Dios Hospital ang biktimang si Pedro Pingoy, ng 69 Malumanay St.,Teachers Village, Quezon City.
Sa follow-up operation ng mga awtoridad, naaresto ang mga suspek na sina Ronald Gallego, 33; Rex Menes, 33; at Jose Noah Ombion, 23-anyos.
Nangyari ang insidente dakong 9 p.m. sa Hobbies of Asia sa Macapagal Boulevard ng nasabing lungsod.
Sinisingil ng utang ni Gallego si Ombion na humantong sa kanilang pagtatalo. Inawat sila ni Menes ngunit pinagsasampal ni Gallego si Ombion at tinakot na sasaksakin.
Nagresponde ang ilang security guard sa insidente habang nakiusyuso si Pingoy.
“Sige nga, saksakin mo nga,” kantiyaw ni Pingoy kay Gallego na ikinairita ng mga suspek kaya pinagtulungan nilang bugbugin at saksakin ang biktima.
(JAJA GARCIA)
