LABING-ANIM na bala ng .9mm at kalibre .45 baril ang umutas sa buhay ng laborer nang ratratin ng hindi nakikilalang mga suspek sa Quezon City, kahapon.
Dead on the spot ang biktimang si Emilio Tandoc, 21, ng Phase 1,Purok 12, Lupang Pangako, Brgy. Payatas, Quezon City.
Ayon kay PO3 Jayson Tolentino, ng Quezon City Police District Office (QCPO) Station 6, naganap ang insidente dakong 2:45 a.m., sa loob ng Amlack Subd., Payatas Road, kanto ng Hope St., Lupang Pangako, Brgy. Payatas.
Sa report ng pulisya, sinamahan ng biktima ang kanyang pinsan na si Landa Sabal sa inoman saka nagpaalam na magpapa-gasolina ng motorsiklo (UK-9396), sa kalapit na gasoline station.
Habang nagpapagasolina si Tandoc, biglang pinagbabaril ng mga suspek na mabilis umeskapo nang makompirmang patay ang biktima.
Isinailalim ng pulisya ang 16 basyo ng bala ng .9mm at kalibre .45 para sa imbestigasyon.
(JETHRO SINOCRUZ)
