Joseph Marco, malakas ang dating sa opposite sex!

ni Nonie V. Nicasio

MAALAGA pala si Joseph Marco sa kanyang health, kaya twice a week kung magpunta ito sa gym. Nalaman din namin na bukod sa regular na pagwo-work-out, istrikto rin siya sa kanyang mga kinakain.

Pawang mga healthy foods daw ang kinakain ni Joseph at lagi rin siyang alisto sa kanyang diet, kaya naman pala maganda ang pangangatawan nito.

Hindi rin kami nagtaka nang marinig naming malakas ang dating ng Kapamilya actor na ito sa maraming mga members ng opposite sex at pati na rin sa third sex. Madalas din daw na trending topic sa Twitter si Marco dahil sa love triangle na nabubuo sa kanilang mga karakter sa seryeng Pure Love ng ABS CBN.

Ginagampanan ni Joseph dito ang papel ni Dave, samantalang sina Alex Gonzaga at Yen Santos ay gumaganap naman bilang sina Diane at Ysabel, respectively.

Nabanggit nga ni Alex ang kakaibang charismang ito ni Joseph. “Hindi ko masisisi ang viewers namin na agad na-in love kay Joseph, kasi talagang may something special sa kanya.

“Very mysterious kasi si Jowsy (tawag ni Alex kay Joseph) kaya akala ko noong una, hindi kami magiging close. Pero mali ako, kasi napakabait niya, madaling lapitan at masarap kausap. At hanga ako sa kanya bilang actor dahil napaka-professional niya. Tuwing take namin, in character agad siya bilang Dave.”

Nabalitaan din naming patok na patok sa ratings ang serye nila. Base sa datos mula sa Kantar Media noong July 30, pang-apat ang tinaguriang primetime’s newest sensation sa listahan ng most-watched TV shows sa buong bansa taglay ang national TV rating na 20.4%, o lampas doble ng nakuha ng katapat nitong programa sa GMA-7 na My BFF (8.5%).

Kasama nina Alex, Joseph, at Yen sa Pure Love sina Arjo Atayde, Arron Villaflor, Matt Evans, Yam Concepcion, at ipinakikilala si Anna Luna. Bahagi rin ng cast sina Sunshine Cruz, John Arcilla, Ana Capri, Bart Guingona, Dante Ponce, at Shey Bustamante. Ito’y sa ilalim ng direksyon ni Veronica Velasco.

First time kong napansin ang 25 year old na si Joseph sa TV series na Honesto. Kaya malaking break sa kanya itong Pure Love na laging tinututukan ng dalawang anak ko tuwing hapon, bago mag-TV Patrol.

Kung maaalagaan lang nang husto si Joseph, maaari siyang sumunod sa yapak ng mga A-list leading man ng Kapamilya Network.