NAKATAKDANG sampahan ng patong-patong na kaso ang isang kawatan na manyakis makaraan gahasain at saksakin ang niloloobang 38-anyos ginang sa Valenzuela City kamakalawa ng madaling araw.
Sa follow-up operation, agad nasakote ang suspek na kinilalang si Rolando Balesa, 38, caretaker ng isang bahay sa #103 L. San Diego St., Brgy. Canumay, nahaharap sa mga kasong rape, robberry at frustrated homicide.
Kasalukuyang nagpapagaling sa Valenzuela Medical Center (VMC) ang biktimang si Carolina Calixto, 38, PT admin officer ng St. Lukes Medical Center, at residente ng kalapit na bahay na binabantayan ng suspek sa nasabing barangay, sanhi ng mga saksak sa iba’t ibang bahagi ng katawan.
Sa ulat mula kay Valenzuela City Police chief, S/Supt. Rhoderick Armamento, dakong 1 a.m. nang maganap ang insidente sa loob ng bahay ng biktima sa nasabing barangay.
Pinasok ng suspek ang bahay ng biktima sa pamamagitan ng pagbasag sa decorative tiles sa pader hanggang maabot ang door knob nito.
Nagising ang biktima habang isa-isang inilalagay sa bag ng suspek ang mga kagamitan ngunit tinutukan siya ng patalim sa leeg saka ginahasa.
Lumaban ang biktima kaya pinagsasaksak siya ng suspek saka mabilis na tumakas. (ROMMEL SALES)
