Iya, boring mag-host; nakaiirita pa ang pagharang sa mga tanong!

ni Roldan Castro

MAY bagot factor si Iya Villana na naging host sa presscon ng Yes! Magazine’s Most Beautiful Star for 2014 na si Sarah Geronimo ang nanguna at cover girl ngayong taong ito.

Kulang sa saya ang nasabing presscon dahil isang pasosyal na si Iya ang kinuha nila na ayaw tumigil sa kai-English.

‘Yung mga tanong niya sa mga artistang naroon ay hindi rin tamang materyales para maisulat para masiyahan din naman ang mga editor namin.

Nakaiirita rin ang pakikisawsaw niya sa pagtatanong kay Sarah na sa sarili naming opinion ay walang wawa. Feeling niya ay talk show host siya sa isang TV show na boring, walang ratings  at papatayin mo lang ang TV.

Hindi napagtagumpayan ni Iya na maging host sa event ng Yes! sa Elements, Centris Mall dahil maraming press ang hindi natuwa sa kanya.

Buti na lang nagnakaw ng eksena at marami ang naaliw kay Ryzza Mae Dizon sa pagsasabing “Maganda po ba ako? Parang hindi naman!”. Ha!ha!ha! Pasok siya sa banga!

Hinarang din ni Iya ang tanong ng katotong Glenn Sibonga tungkol sa isyung nai-insecure umano si Aljur Abrenica kay Alden Richard. Akmang sasagot na si Alden pero hindi pumayag si Iya at sa one on one na lang daw itanong.

Pero dahil umalis agad si Alden at lumabas sa backstage after ng open forum, marami tuloy ang nairita sa pagiging madiwara ni Iya. Hindi na lang niya pinagbigyan na sagutin ‘yun para may mapulot namang materyales.

Puwes,  ang pagiging boring na lang niya ang host ang maisusulat ngayon, huh!