Daniel at Kathryn, ire-remake ang Pangako Sa ‘Yo

TIYAK na muling matutuwa ang KathNiel fans dahil ang susunod na soap drama nina Daniel Padilla at Kathryn Bernardo ay ang remake ng Pangako Sa ‘Yo na pinagbidahan nina Jericho  Rosales at Kristine Hermosa na umere noong Nobyembre 2000 hanggang Setyembre 2002.

Nadulas sa amin ang kausap naming taga-ABS-CBN nang makatsikahan namin tungkol sa update ng She’s Dating The Gangster na sobrang saya raw ng mga taga-Star Cinema dahil magaganda ang feedbacks ng pelikula ng dalawang bagets at pinuri nang husto ang acting nina Daniel at Kathryn.

“Ang bilis ng evolution ng acting nina Daniel at Kathryn, parang kailan lang sa ‘Princess and I’, mga hindi marunong umarte, puro pa-cute lang, tapos sa ‘Got To Believe’, nag-improve na tapos dito sa ‘She’s Dating The Gangster’, nakitaan mo na ng serious acting ‘yung dalawa,” masayang sabi sa amin.

Nagkatoon daw kaagad ng meeting ang creative department ng Star Cinema para bigyan ng follow-up movie sina Daniel at Kathryn na ang magdidirehe ay mismong si Ms Olive ‘Inang’ Lamasan.

“Eh, alam mo naman kapag si Inang, drama-drama ‘yan na may pagka-comedy ng kaunti kaya ‘di ba, made na talaga sina DJ at Kath,” pahayag pa.

At habang nagkukuwento tungkol sa SDTG ay nabanggit na, “alam mo ang next soap na gagawin nina Daniel at Kahtryn, remake ng ‘Pangako Sa ‘Yo’ nina Jericho at Kristine.”

At talagang nanlaki ang mga mata namin Ateng Maricris dahil alam mo naman kung gaano kaganda ang Pangako Sa ‘Yo at tiyak na ang supporters ng KathNiel ang lubos na maliligayahan.

“Next year ang ‘Pangako Sa ‘Yo’, Reggee, pati ang follow-up movie,” say sa amin.