PATAY ang isang sanggol at kapatid niyang paslit nang matabunan ang kanilang bahay sa naganap na landslide sa liblib na lugar sa bayan ng Rodriguez sa lalawigan ng Rizal kahapon ng madaling-araw.
Sa inisyal na impormasyon mula sa Provincial Disaster Risk Reduction and Management Office, naganap ang insidente dakong 3:30 a.m. sa Sitio Bambanin, Brgy. San Isidro ng nasabing bayan.
Ayon sa ulat, malakas ang buhos ng ulan nang maganap ang insidente.
Iniulat ng PDRRMO, ang mga biktima ay sina John Michael Amor, anim-buwan gulang, at Rey Amor, 3-anyos, nakatira sa Sitio Bambanin, Lukutang Maliit, Brgy. San Isidro.
Isinugod ang mga biktima sa Casimiro Ynares Sr. Memorial Hospital ngunit hindi na nasagip ang kanilang buhay.
nina ED MORENO/MIKKO BAYLON
