HATAW! D'yaryo ng Bayan hatawtabloid.com
ni Alex Datu
BALITA noon, nagkakaigihan na sina Piolo Pascual at Shaina Magdayao at maraming masaya dahil tiyak mapapadali na ang paglagay sa tahimik ng aktor. As in, mayroon na itong paglalaanan ng kanyang pagmamahal at posibleng mauwi sa kasalan ang kanilang nababalitang relasyon.
Kaya lang sa isang interbyu sa aktres, nabanggit nitong hanggang ngayon ay single pa rin siya at patuloy ang paghahanap ng kanyang Mr Right. Hence, maraming nanghinayang ngayon sa nabalitang relasyon ng dalawa dahil ang balita noon, magkasundo sila at sabay pa silang dumadalo sa fellowship.
Lalong nawalan ng pag-asawa ang ilang nagmamahal sa aktor dahil base sa interbyu, sinabi nitong sobra silang abala sa kani-kanilang trabaho at tama naman sa parte ni Piolo, kasalukuyan nitong ginagawa ang Hawak Kamay, isang teleserye na pagsasamahan nila ni Iza Calzado samantalang wala kaming alam na pinagkakaabalahan si Shaina.
Ayon kay Piolo, ang importante, tuloy pa rin ng pagkakaibigan nila ng aktres kaya kung anong nasimulan nilang relasyon ay papanatilihin ito. “Maliit lang naman ang mundo natin, ganoon na lang muna,” paliwanag ng aktor at dagdag pa nito, palagi silang nagkikita at nagkakausap sa ASAP.
Sa ngayon, binabalanse ng aktor ang lahat tulad ng kanyang pamilya, karir, at pag-ibig pero nadagdagan pa ito ng isa, kailangan nitong bigyan ng panahon si Inigo lalo at wala siya sa piling ng anak sa pagbibinatilyo nito. Sa puntong ito, isang unsolicited advice ang puwede naming ibigay kay Shaina, humayo ka at hanapin ang Mr Right mo. Mahirap na, sa paggising mo isang araw, matanda ka na pala.
LANCE, NAGING VISIBLE MATAPOS ANG AKSIDENTE
NATAWA si Lance Raymundo sa tsikang blessing in-disguise ang tinamong freak accident nang mahulog sa kanyang mukha ang barbel. Naging visible ito sa TV guestings at left and right ang artikulo sa kanya sa mga pahayagan.
“Kung alam lang ng lahat ang pinagdaanan ko, kung gaano kasakit ang barbel na tumama sa aking mukha na talagang na-deform ito at muntik ngang lumuwa ang aking mga mata, mukha, ayaw kong mangyari sa akin ‘yun kahit sabihing blessing in-disguise dahil pinag-uusapan ako ngayon sa apat na sulok ng showbiz,” pahayag nito.
Sa puntong ito, pinasalamatan namin ang actor/singer dahil pinagbigyan niya ang aming paanyaya na mag-guest sa aming set sa The Crowd Restobar dahil regular kami roong kumakanta. “Nagpapasalamat din ako sa ‘yo Kuya Alex at ito ang aking unang live performance after my freak accident dito sa set mo. Thank you po,” pahayag nito pagkatapos kumanta.
Ayon din sa kanya, nasabi nitong pinag-isipan nila noon kung idedemanda ang gym na kanyang pinupuntahan pero mismo ang ina nitong relihiyosa ang nagasabing, aksidente ang nangyari kaya walang dapat sisihin at walang dapat iturong may kasalanan. ’Ika nga, everything has a reason why it happened. tulad ngayon, maraming nagsabing gumuwapo siyang lalo pagkatapos ng operasyon sa mukha at nagkaroon ng mga offer para magkaroon ng concert, pelikula at speaking engagements.
Sa madaling salita, hindi nakasama kundi nakatulong sa aktor ang freak accident na nangyari sa kanya hence, blessing in-disguise, ‘yun na!
