Wednesday , July 17 2024

Para may bigas, sitsirya’y inuulam… buhay masa sa PNoy gov’t

MARAMI-RAMI na at patuloy pang bumababa ang pagtitiwala sa gobyernong PNoy ngayon, hindi tulad nang dati o noong bagong upo ang Pangulong Noynoy na maraming bilib sa kanya.

Bumilib kay PNoy dahil sa mga itinanim ng kanyang ama’t ina sa masa – oo sina dating Sen. Ninoy Aquino at Pangulong Cory Aquino na isa sa pinakadahilan upang iboto at pagkatiwalaan ng marami si PNoy nang tumakbo sa pagkapangulo. ‘Ika nga, nanalo siya dahil sa dalawang karespe-respetong mag-asawa na maituturing na modern day heroes.

Pero mukhang ang pagtitiwala sa kasalukuyang gobyerno ay unti-unti nang kumukupas. Obserbasyon lang natin ito ha, mula sa mga nakakalap natin reaksyon o komento laban sa gobyerno.

Hindi komento o kritiko mula sa kaaway ng gobyernong PNoy sa politiko kundi mula sa mga ordinaryong masa na kinabibilangan natin. Ang nakita at mga narinig natin dahilan ng unti-unting hindi pagtitiwala sa gobyerno, ang walang tigil na pagtaas ng mga pangunahing bilihin.

Mga pangunahing bilihin na sa araw-araw ay nagiging pabigat sa bulsa ng masa – oo tulad ng walang tigil na pagtaas ng presyo ng karne – baboy, manok at baka; kape, asukal, gatas at higit ang BIGAS.

Oo nga, may NFA na panapat sa commercial rice pero kulang naman sa suplay o ‘di kaya anang iba ay halos hindi makain pero, infairness iyong P32.00 per kilo ay medyo maganda-ganda rin. Bumibili din kasi ako nito.

Sabi nga ng mga nakakausap ko at ilan naman ay narinig lang. Mas lalong hirap sila ngayon dahil sa sobrang taas ng bilihin. Kumbaga, ang komento o kritiko ay taliwas na iniyayabang ng NEDA sa kasalukuyang gobyerno na bumaba ang bilang ng mahirap ngayon lalo na ang mga nagugutom. Ha! Ano!?

Ilan linggo na lang, SONA na naman. Ano naman kaya ang iuulat ng Pangulo sa bayan. Ang maginhawa na ang buhay ng bawat Pinoy? Ang wala nang nagugutom sa panahon niya o bumaba na ang bilang ng mga nagugutom? Ang walang nangyaring anomalya sa panahon niya na walang kinalaman ang kanyang mga kaalyado? Ang pagpapakulong sa kanilang katunggali sa politiko? Ang linisin si BDM Sec. Butch Abad sa ilegal na DAP?

Maraming puwedeng papogi na sasabihin si PNoy – siyempre, alangan naman mag-uulat siya ng negatibo kundi … laglag siya. ‘Di ba Budget Sec. Abad.

Iyon lang, hindi ang mga papogi ang kailangan ng nakararami ngayon kundi ang solusyon sa sobrang taas ng mga bilihin partikular na ang BIGAS na tila wala nang pag-asang bumaba.

Sa sobrang mahal nga ng bigas, ilan pamilya ang naobserba kong pinagkakasya na lamang nila sa loob ng isang araw ang isang kilo. Filipino size na pamilya – ibig sabihin ay hanggang 5 katao sa isang pamilya.

Bukod dito, dahil pa sa sobrang kahirapan sanhi nga ng sobrang mahal ng mga pagkain. Nakalulungkot sabihin ito pero saksi ako sa mga nangyayari – oo maging sitsirya ay ginagawa nang ulam. Kung dati-rati ay toyo o bagoong ay naging ang tigpi-pisong sitsirya ang inuulam.

Ganito ang epekto ng sinasabing ‘nakaaangat’ na ang ekonomiya ng ‘Pinas sa ilalim ni PNoy.

Baka naman ang ibig sabihin ng Palasyo ay nakaaangat ang nakararami sa kapanalig ni PNoy dahil sa DAP.

DAP? Aba’y in good faith naman daw ito at nagamit sa maayos na mga proyekto – masa raw ang nakinabang dito. Ano!?

Well, ano pa man ang palusot ng Palasyo sa ilegal na DAP, isa pa rin itong ilegal. Ang usapan kasi ay hindi puwedeng pakialaman ang savings ng isang ahensya para ilipat sa ibang proyekto. Iyon ang isyu rito at hindi ang kung ano-anong palusot ng palasyo.

Well, sana naman tandaan ni PNoy na sa sobrang hirap na mahal ng mga pangunahing bilihin, maging ang mga tigpipisong sitsirya ay inuulam na.

Sabi pa naman ni PNoy noon, walang mahirap kung walang corrupt. Tama si PNoy diyan. Pero paano iyong mga corrupt sa panahon mo? Dedepensahan na lamang ba ng Palasyo?

***

Para sa inyong suhestiyon, komento, reklamo at panig, magtext lang sa 09194212599.

Almar Danguilan

About Almar Danguilan

Check Also

Maris Racal Rico Blanco Anthony Jennings

Maris nilinis pangalan ni Anthony; Rico pinagtagpo pero hindi itinadhana

SHOWBIZ KONEKni Maricris Valdez Nicasio “ANTHONY is out of the picture.” Ito ang agad na nilinaw …

Bini SB19 Flow G

SB19, Bini pinadagundong ang Araneta, Puregold’s Thanksgiving Concert star studded

SHOWBIZ KONEKni Maricris Valdez Nicasio NAKABIBINGI at parang nasira ang aming ear drum sa sobrang …

Alden Richards It’s Showtime

Alden nagkaroon ng biglaang meet & greet sa It’s Showtime 

I-FLEXni Jun Nardo INAKYAT ni Alden Richards ang itaas na bahagi ng It’s Showtime studio nang mag-guest siya sa …

Blind Item, Matinee Idol, Mystery Man

Male Starlet walang maipagmalaking project kahit nakakontrata sa isang kompanya

ni Ed de Leon ANG bagay nga sigurong project para sa isang male starlet ay “Bata. Bata …

James Reid Issa Pressman

James Reid lipas na, inulan ng panlalait sa internet 

HATAWANni Ed de Leon KAWAWA rin naman si James Reid kung noong panahon ng kanyang kasikatan ay …

Leave a Reply

Your email address will not be published. Required fields are marked *