Mga serye ni JC, nagmarmarka!

ni Roldan Castro

[divider]
MASUWERTE si JC De Vera sa paglipat niya sa ABS-CBN 2 dahil nagmamarka ang mga serye na nasalihan niya. Pinag-usapan ang seryeng The Legal Wife bago nagtapos at ngayon naman ay extended ang Moon of Desire bilang leading man ni Meg Imperial tuwing 2:45 ng hapon.

Magmula raw nang maging Kapamilya siya ay nag-concentrate siya sa trabaho. Hindi naman niya isinasara ang pintuan dahil darating din ang time na makakatagpo siya ng bagong pag-ibig. Marami raw siyang nakikitang magaganda at crush niya pero hindi pa nagkakaroon ng time para lubusan niyang makilala. Hangang tingin-tingin lang daw siya ngayon.

Attracted siya kay Maja Salvador pero alam niyang taken na ito kaya hanggang tingin na lang daw siya.

Anytime naman daw ay handa na siyang mag-asawa. Hindi lang niya minamadali. Baka raw three to five years ay puwede na siyang lumagay sa tahimik lalo’t maganda ang mga opportunity na dumarating sa kanya.