Jolas balik-PBA

ISA si Jojo Lastimosa sa mga magiging assistant coaches ng North Luzon Expressway (NLEX) sa una nitong pagsabak sa PBA 40th season na magsisimula sa Oktubre 19.

Kinpompirma ng isang opisyal ng NLEX na si Lastimosa ay magiging chief assistant ni Boyet Fernandez na hahawak sa Road Warriors bilang head coach pagkatapos ng kampanya ng San Beda College sa NCAA.

Si Fernandez ay coach din ng Red Lions na nangunguna ngayon sa NCAA na may tatlong sunod na panalo.

Bukod kay Lastimosa, kasama rin sa coaching staff ng NLEX ang mga dating assistant coaches ni Fernandez na sina Adonis Tierra, Raymond Celis, Ford Arao at Jay Serrano.

Idinagdag din sa staff ng Road Warriors si Sandy Arespacochaga na dating taga-Talk n Text.

Isa ang NLEX sa tatlong bagong koponang sasabak sa bagong PBA season na magsisimula sa Oktubre, kasama ang Blackwater Sports at KIA Motors.

Samantala, sinabi ng nasabing opisyal ng NLEX na mananatili ang koponan sa PBA D League at gagamitin ang pangalang Philex o Cignal TV.

Ang mga manlalaro ng San Beda ay bubuo sa bagong koponan ng MVP Group sa D League.

(James Ty III)