Bigong makapasok sa construction nanarak ng ice pick

KRITIKAL ngayon ang isang mister matapos saksakin ng kapitbahay na hindi natulungang makapasok sa isang construction kamakalawa ng gabi sa Caloocan City.

Ginagamot ngayon sa ospital ang biktimang si Rodolfo Muncal, 43, contruction worker, ng Dimasalang St., Maypajo, Brgy. 30 ng nasabing lungsod.

Tumakas ang suspek na kinilala lamang sa pangalang Jess.

Sa ulat ni PO1 Genesis Acana, may hawak ng kaso, dakong 6:45 pm nang maganap ang insidente sa kanto ng Dimasalang at Binangonan Sts. ng nasabing barangay.

Pauwi na ang biktima nang salubungin ng suspek at nang malaman na hindi maipapasok sa pinagtatrabahuhang contruction site ay nagalit at inundayan ng saksak ng ice pick ang biktima.

Tumakas ang suspek at ngayon ay pinaghahanap na ng pulisya.

(ROMMEL SALES)